- పద్నాలుగేళ్ల వయసులో తండ్రి ఎన్టీఆర్ దర్శకత్వం వహించిన ‘తాతమ్మ కల’ చిత్రంతో వెండితెరకు బాలకృష్ణ పరిచయం అయ్యారు.
- కథానాయకుడు కాకముందు బాలకృష్ణ నటించిన ‘తాతమ్మ కల’, ‘దాన వీర సూర కర్ణ’, ‘అక్బర్ సలీమ్ అనార్కలీ’, ‘శ్రీమద్విరాట్పర్వం’, ‘శ్రీ తిరుపతి వేంకటేశ్వర కల్యాణం’ చిత్రాలకు ఎన్టీఆర్ దర్శకత్వం వహించారు.
- బాలకృష్ణ బాల్యమంతా హైదరాబాద్లోనే గడిచింది. నిజాం కాలేజ్లో డిగ్రీ చదివారు.
- తొలినాళ్లలో సహాయ నటుడిగా వివిధ సినిమాల్లో నటించారు. వాటిలో తన తండ్రి ఎన్టీఆర్తో కలిసి నటించిన చిత్రాలే ఎక్కువ.
- బాలకృష్ణ కథానాయకుడిగా వెండితెరకు పరిచయమైన చిత్రం ‘సాహసమే జీవితం’. 1984 జూన్ 1న విడుదలైన ఈ చిత్రానికి భారతి-వాసు దర్శకత్వం వహించారు. విజి కథానాయికగా నటించారు.
- కథానాయకుడిగా మారిన తర్వాత ఎన్టీఆర్ దర్శకత్వంలో ‘శ్రీమద్విరాట్ పోతులూరి వీరబ్రహ్మేంద్రస్వామి చరిత్ర’ చిత్రంలో బాలయ్య నటించారు.
- 1987లో అత్యధికంగా బాలకృష్ణ 8 చిత్రాల్లో నటించారు. ‘అపూర్వ సోదరులు’, ‘భార్గవ రాముడు’, ‘రాము’, ‘అల్లరి కృష్ణయ్య’, ‘సాహస సామ్రాట్’, ‘ప్రెసిడెంట్గారి అబ్బాయి’, ‘మువ్వ గోపాలుడు’, ‘భానుమతిగారి మొగుడు’ చిత్రాలు విడుదలయ్యాయి.
- ఎ.కోదండరామిరెడ్డి దర్శకత్వంలో బాలకృష్ణ అత్యధికంగా 11 సినిమాల్లో నటించారు.
- . కోడి రామకృష్ణ దర్శకత్వంలో ఏడు, కె.రాఘవేంద్రరావు దర్శకత్వంలో ఆరు సినిమాల్లో నటించారు.
- సొంతపేరుతో బాలకృష్ణ ఏడు సినిమాల్లో నటించారు. తొలి చిత్రం ‘తాతమ్మకల’లో ఆయన పేరు కూడా బాలకృష్ణనే. ఆ సమయంలో బాలకృష్ణ తొమ్మిదో తరగతి చదివేవారు.
- బాలకృష్ణ 25వ చిత్రం ‘నిప్పులాంటి మనిషి’. ఎస్.బి.చక్రవర్తి దర్శకుడు. 50వ చిత్రం ‘నారీ నారీ నడుమ మురారి’ ఎ.కోదండరామిరెడ్డి దర్శకత్వం వహించారు. ఇక 75వ చిత్రం ‘క్రిష్ణబాబు’ ముత్యాల సుబ్బయ్య దర్శకుడు. 100వ చిత్రం ‘గౌతమీపుత్రశాతకర్ణి’ క్రిష్ దర్శకత్వం వహించారు.
- ‘ఇన్స్పెక్టర్ ప్రతాప్’, ‘తిరగబడ్డ తెలుగు బిడ్డ’, ‘రౌడీ ఇన్స్పెక్టర్’, ‘లక్ష్మీ నరసింహా’, ‘అల్లరి పిడుగు’, ‘చెన్నకేశవరెడ్డి’ తదితర చిత్రాల్లో బాలకృష్ణ పోలీస్ ఆఫీసర్గా నటించారు.
- బాలకృష్ణ నటించిన జానపద చిత్రం ‘భైరవ ద్వీపం’. రోజా కథానాయిక. సింగీతం శ్రీనివాసరావు దర్శకత్వం వహించారు.
- ‘భైరవద్వీపం’ విడుదలయ్యే వరకూ ఇందులో ఆయనే కురూపి వేషం వేశారన్న విషయాన్ని దాచిపెట్టారు. ఆ మేకప్ వేసుకోవడానికి తీయడానికి రెండేసి గంటలు సమయం పట్టేది.
- బాలకృష్ణ మొత్తం 15 చిత్రాల్లో ద్విపాత్రాభినయం చేశారు. ‘అధినాయకుడు’లో ట్రిపుల్రోల్ పోషించారు.
- ఏఎన్నార్తో కలిసి రెండు సినిమాల్లో నటించారు. ఒకటి ‘భార్యాభర్తల బంధం’ కాగా, మరొకటి ‘గాండీవం.
- బాలకృష్ణ నటించిన ‘నిప్పు రవ్వ’, ‘బంగారు బుల్లోడు’ ఒకే రోజున విడుదలయ్యాయి.
- బాలకృష్ణ అతిథి పాత్రలో నటించిన ఏకైక చిత్రం ‘త్రిమూర్తులు’.
- సినిమా ఆడదని తెలిసినా, తండ్రి మాటకు గౌరవం ఇచ్చి నటించిన చిత్రం ‘తిరగబడ్డ తెలుగు బిడ్డ’.
- బాలకృష్ణ నటించిన 35 చిత్రాలకు పరుచూరి బ్రదర్స్ ప్రత్యక్షంగానూ, పరోక్షంగానూ పనిచేశారు.
బాలకృష్ణ కోసం పరుచూరి బ్రదర్స్ రాసిన కథతో ‘అల్లరి కృష్ణయ్య’ కథ క్లాష్ అయింది. దీంతో పరుచూరి బ్రదర్స్ ‘ప్రెసిడెంట్గారి అబ్బాయి’ కథ రాశారు. తొలుత ఈ సినిమాకు భానుప్రియను అనుకున్నారు. కానీ, సుహాసిని నటించారు.- బాలకృష్ణ డైలాగ్ బాడీ లాంగ్వేజ్తో పాటు, డైలాగ్ లాంగ్వేజ్ మార్చిన చిత్రం ‘రౌడీ ఇన్స్పెక్టర్’.
- ‘రౌడీ ఇన్స్పెక్టర్’ సినిమా కోసం బాలకృష్ణ రోజూ పోలీస్ జీపులోనే షూటింగ్కు వచ్చేవారట.
- ‘సమర సింహారెడ్డి’ చిత్రానికి తొలుత ‘సమర సింహం’ అని పెడదామనుకున్నారు. కానీ, చివరకు ప్రస్తుతం ఉన్న టైటిల్ అయితేనే బాగుంటుందని ఖరారు చేశారు.
- ‘నరసింహనాయుడు’ సినిమాను దేవి థియేటర్లో చూసిన గేటు బయటకు రావడానిడి దర్శకుడు బి.గోపాల్, రచయిత పరుచూరి గోపాలకృష్ణకు గంటా ఏడు నిమిషాలు పట్టింది.
- బాలకృష్ణ తాను నటించిన చిత్రాల్లో ఎక్కువగా ఇష్టపడేది ‘సమర సింహారెడ్డి’.
- ‘నరసింహనాయుడు’లో కంటిచూపుతో చంపేస్తా డైలాగ్ మొదట లేదు. షూటింగ్ చివరి రోజున పరుచూరి గోపాలకృష్ణ రాశారు.
- బాలకృష్ణ నిద్రలేవగానే భూదేవికి నమస్కారం చేసి కాళ్లు కిందపెడతారు.
- రజనీకాంత్ నటించిన చిత్రాల్లో ‘ముత్తు’, అమితాబ్ ‘అగ్నిపథ్’, చిరంజీవి ‘జగదేక వీరుడు అతిలోక సుందరి’ సినిమాలంటే బాలకృష్ణకు ఇష్టం.
- .బాలకృష్ణ నటించిన ‘ఆదిత్య 369’ చిత్రానికి చిరంజీవి ప్రచారం చేశారు.
- బాలకృష్ణ రాముడిగా కనిపించిన చిత్రం ‘శ్రీరామరాజ్యం’
- బాలకృష్ణ కృష్ణుడిగా ‘కృష్ణార్జున విజయం’, ‘పాండురంగడు’ చిత్రాల్లో కనిపించారు.
- ‘విశ్వామిత్ర’ షూటింగ్ సమయంలో కపాల మోక్షం పొందే నేపథ్యంలో సన్నివేశాలు తీస్తున్నారు. అప్పుడు బాలకృష్ణ కాలి వద్ద టపాసు పేలాలి. కానీ అది పేలలేదు. అంతలో మరొకటి విసరమని ఎన్టీఆర్ చెప్పారట. దీంతో పాటు అంతకుముందు వేసింది కూడా పేలింది. ఓ వైపు కాలికి గాయమై రక్తం కారుతున్నా, షాట్ పూర్తయ్యే వరకూ బాలకృష్ణ కదల్లేదు.
- స్వీయ దర్శకత్వంలో ‘నర్తనశాల’ తెరకెక్కించాలనేది బాలకృష్ణ చిరకాల కోరిక. దానికి తగ్గట్టే సినిమా చిత్రీకరణ ప్రారంభించినా… వివిధ కారణాల వల్ల సినిమా ఆగిపోయింది.
- బాలకృష్ణ మూడుసార్లు ఉత్తమ నటుడిగా నంది అవార్డు అందుకున్నారు. ‘నరసింహనాయుడు’, ‘సింహా’, ‘లెజెండ్’ చిత్రాల్లో నటనకు గానూ ఈ అవార్డులు లభించాయి.
- ఎన్టీఆర్, బసవతారకం దంపతులకు ఆరో కుమారుడిగా నందమూరి బాలకృష్ణ 1960 జూన్ 10న మద్రాసులో పుట్టారు.
- అద్దె సైకిళ్లు తీసుకుని ట్రూప్ బజార్, సుల్తాన్ బజార్ తిరిగేవారు.
- బాలకృష్ణకు తెలుగు భాష, పద్యాలు, పురాణాల గురించి చెప్పడానికి ప్రత్యేకంగా ఒక తెలుగు మాస్టార్ ఉండేవారు. పద్యాలు సరిగ్గా చెప్పకపోతే ఆయన తొడపాశం పెట్టేవారట.
- బాలకృష్ణకు 1982లో వసుంధర దేవితో వివాహం అయింది. వీరికి బ్రాహ్మణి, తేజస్వి ఇద్దరు కూతుళ్లు కాగా, మోక్షజ్ఞ కుమారుడు.
- బాలకృష్ణ తెల్లవారుజామున 3.30 గంటలకు నిద్రలేస్తారు. తప్పనిసరిగా యోగా, వ్యాయామం చేస్తారు.
- బాలకృష్ణ తొలిసారి పాట పాడిన చిత్రం ‘పైసా వసూల్’. ‘మామా..ఏక్ పెగ్ లా’ అనే పాట పాడారు.
- ‘లెజెండ్’లో నటనకు గానూ ఉత్తమ నటుడిగా బాలకృష్ణ ‘సైమా’ అవార్డును అందుకున్నారు.
- బాలకృష్ణకు భక్తి ఎక్కువ. దేవుడిని నమ్ముతారు. అందుకు ప్రతిరోజూ తప్పకుండా పూజా చేస్తారు. ‘మనకోసం మనం కేటాయించుకునే సమయం ఒకటుంది. నాకు పూజా సమయం’ అని చెబుతుంటారు బాలయ్య. సూర్యోదయం అవ్వకముందే పూజా కార్యక్రమం ముగిస్తారు.
- తన కుటుంబం కోసం ఏమిచ్చాను? తన కోసం ఎంత సమయం కేటాయించుకున్నానో బాలయ్య ఆలోచిస్తుంటారు. ఓ భర్తగా, తండ్రిగా తన కర్తవ్యాన్ని ఎప్పుడూ విస్మరించలేదని చెబుతారు.
- ఆహారం విషయంలో బాలకృష్ణకు ప్రత్యేక నియమాలు అంటూ ఏవీ లేవు. అన్నీ తింటారు. ఇక సినిమాల్లో పాత్రను బట్టి తన డైట్లో స్వల్ప మార్పులు చేసుకుంటారు. అయితే, రాత్రి పూట మాత్రం భోజనం చేయరు.
- బాలకృష్ణ ఇప్పటివరకూ ఒక్క కమర్షియల్ యాడ్లోనూ నటించలేదు.
- ఎన్టీఆర్ నటించిన అన్ని సినిమాల్లో ‘సీతారామ కళ్యాణం’ చాలా గొప్ప సినిమా అని బాలకృష్ణ అనేవారు.
- బాలకృష్ణ నటించిన ‘ఆదిత్య 369’ ఇండియన్ ఇంటర్నేషనల్ ఫిల్మ్ ఫెస్టివల్లో ప్రదర్శించారు. బాలకృష్ణ డ్రీమ్ ప్రాజెక్టుల్లో ‘ఆదిత్య 999’ కూడా ఒకటి.
- బాలకృష్ణ ‘సింహం’ పేరు కలిసేలా ఎనిమిది చిత్రాలు వచ్చాయి. ‘సింహం నవ్వింది’, ‘బొబ్బిలి సింహం’, ‘సమర సింహారెడ్డి’, ‘నరసింహనాయుడు’, ‘సీమ సింహం’, ‘లక్ష్మీ నరసింహా’, ‘సింహా’, ‘జై సింహా’.
- బాలకృష్ణ ‘9’ అంకెను నమ్ముతారు. తన సినిమాకు సంబంధించిన ఏది ప్రకటించాలన్నా ‘9’ కలిసేలా చూసుకుంటారు.
- బాలకృష్ణకు ఫేస్బుక్ ఖాతాలో మాత్రమే అకౌంట్ ఉంది. ప్రస్తుతం 9,07,093 మంది అనుసరిస్తున్నారు.
- బాలకృష్ణ ఇప్పటివరకూ ఎప్పుడూ సిక్స్ ప్యాక్లో కనిపించలేదు. ఎందుకు అని అడిగితే, ‘నేను రొమాన్స్ చేస్తే నప్పదు. చొక్కాలు విప్పి సిక్స్ప్యాక్ చేసినా చూడరు. అది మన సంస్కృతి కాదు’ అని సమాధానం ఇచ్చారు.
- బాలకృష్ణ నిర్మాతగా వ్యవహరించిన ఏకైక చిత్రం ‘ఎన్టీఆర్: కథానాయకుడు’, ‘ఎన్టీఆర్: మహానాయకుడు’
ఇవి కూడా చదవండి :
Also Read : Happy Birthday Samantha Akkineni : 11 ఏళ్లుగా టాలీవుడ్ ను ఏమాయ చేసిందో.. ఇప్పటికీ దూసుకుపోతోన్న సమంత
Also Read : Vijay Deverakonda : రౌడీ స్టార్ రేర్ రికార్డ్, మూడోసారి మోస్ట్ డిజైరబుల్ మేన్ గా విజయ్ దేవరకొండ.
తాజా సమాచారం కోసం మాసిరిమల్లి ఫేస్ బుక్ పేజ్ ను ఫాలో అవ్వండి