KTR : మంత్రి కేటీఆర్ కు కరోనా.. ట్విట్టర్ ద్వారా వెల్లడించిన మంత్రి

KTR : తెలంగాణ మంత్రి కేటీఆర్ కు కరోనా సోకింది. కొవిడ్-19 పరీక్షల్లో తనకు కరోనా సోకినట్లు నిర్థారణ అయ్యిందని ఆయన ట్విట్టర్ వేదికగా ప్రకటించారు. స్వల్ప లక్షణాలే ఉండడంతో ఆయన (KTR) ఇంట్లోనే ఉంటూ చికిత్స తీసుకుంటున్నారు. ఈమధ్య కాలంలో తనను కలిసినవారంతా టెస్టులు చేయించుకోవాలని కోరారు. కొవిడ్ నిబంధనలు పాటించాలన్నారు.

కొద్ది రోజుల కిందే సీఎం కేసీఆర్ కూ కరోనా సోకింది. ఎర్రవల్లిలోని తన నివాసంలో ఆయన విశ్రాంతి తీసుకుంటున్నారు. ఈమధ్యనే ఆయన సాధారణ వైద్య పరీక్షలు కూడా చేయించుకున్నారు.

కరోనా తొలిదశలో కేటీఆర్ హైదరాబాద్ లో తగిన ఏర్పాట్లు చేయడంలో చాలా చురుగ్గా వ్యవహరించారు. గల్లీ గల్లీ తిరుగుతూ అధికారులకు పనులు పనులు పురమాయిస్తూ.. పారిశుధ్యంతోపాటు
ఇతర సదుపాయాల విషయంలో ఎక్కడా లోటు రాకుండా జాగ్రత్త పడ్డారు. వలస కూలీల విషయంలోనూ జాగ్రత్తలు తీసుకున్నారు. వారికి తగిన భోజన, వసతి సదుపాయాలు కల్పించడానికి కృషి చేశారు.

కొవిడ్ సమయంలో తగిన జాగ్రత్తలు తీసుకుంటూనే అభివృద్ధి పనులు ఆగకుండా ప్రణాళికలు రూపొందించారు. ఆయన వేసుకునే చేనేత మాస్కులకు మంచి డిమాండ్ ఏర్పడింది. అందరూ మాస్కులు వేసుకోవాలని, భౌతిక దూరం పాటించాలని పదే పదే విజ్ఞప్తి చేసేవారు. కరోనా సీజన్ మొదలైనప్పటి నుంచి ఆయన ఇంటి నుంచి బయటకు అడుగుపెడితే కచ్చితంగా మాస్కు వేసుకునేవారు.

జీహెచ్ఎంసీ ఎన్నికల ప్రచారంతోపాటు ఇతర ఎన్నికల ప్రచారాల్లోనూ తగిన జాగ్రత్తలు తీసుకున్నారు కేటీఆర్. కానీ కరోనా సెకండ్ వేవ్ చాలా ఉధృతంగా ఉండడంతో చాలామంది దీని బారిన పడుతున్నారు.