Janasena Party Symbol : గాజు గ్లాసు గాయబ్... అవే జనసేన కొంప ముంచాయా?

Janasena Party Symbol : ఉద్యమాన్ని ఉరకలెత్తించడం తెలిసిన జనసేన అధినేత పవన్ కల్యాణ్ కు తమ పార్టీ గుర్తును మాత్రం ఎలా కాపాడుకోవాలో అర్థం కాకుండా పోయింది. అందుకే ఇప్పుడు ఆ పార్టీ గుర్తు అయిన గాజు గ్లాసు గాయబ్ అయ్యింది. గాజు గ్లాసును ఫ్రీ సింబల్ గా ఎన్నికల సంఘం మార్చేసింది. ఇకపై జనసేన ఏదైనా ఎన్నికల్లో పోటీ చేసినా గాజు గ్లాసు (Janasena Party Symbol) గుర్తుపై పోటీ చేసే అవకాశం లేదు.

స్వతంత్ర అభ్యర్థికి కేటాయించినట్లుగానే జనసేన అభ్యర్థులకు కూడా వివిధ గుర్తులు కేటాయిస్తారు. అంతే కాని జనసేన తరపు అభ్యర్థులంతా గాజుగ్లాసు గుర్తుపైనే పోటీ చేసే ఛాన్స్ లేదు. పొత్తు ధర్మం పేరు చెప్పి ఎన్నికల్లో పోటీ నుంచి తప్పుకుంటూ వస్తోంది జనసేన. దీంతో కేంద్ర ఎన్నికల సంఘం కూడా జనసేనకు భారీ షాక్ ఇచ్చింది. అంటే రాష్ట్రంలో ఇప్పుడు గుర్తింపు కలిగిన పార్టీ హోదా నుంచి జన సేనను తొలగించినట్టేనా?

జనసేనను మినహాయిస్తే.. ఏపీలో టీడీపీ, వైసీపీలు మాత్రమే ఇప్పుడు ప్రాంతీయ పార్టీలుగా గుర్తింపు పొందాయి. ఎప్పటిలా వైసీపీకీ ఫ్యాన్ గుర్తు, టీడీపీకి సైకిల్ గుర్తు.. రిజర్వుడ్ సింబల్స్ గా ఉంటాయి. తెలంగాణలో టీఆర్ఎస్, ఎంఐఎంతోపాటు వైసీపీ, టీడీపీలకు కూడా రిజర్వుడ్ గుర్తులు ఉంటాయి. వీటిపైనే ఆయా పార్టీల అభ్యర్థులు పోటీ చేయచ్చు. కానీ జనసేనకు ఆ సదుపాయం లేకుండా పోయింది.

కిందటి సార్వత్రిక ఎన్నికల్లో జనసేన అభ్యర్థులంతా గాజు గ్లాసు గుర్తుపైనే పోటీచేశారు. కానీ ఆ తరువాతే కథ మారింది. పొత్తుధర్మం పేరుతో ఎన్నికల్లో సీట్లను త్యాగం చేస్తూ వచ్చారు. దీంతో ఎన్నికల సంఘం కూడా వారికా గ్లాసు గుర్తును దూరం పెట్టేసింది. అంతెందుకు.. ఈమధ్య తిరుపతి లోక్ సభ ఉపఎన్నికలోనూ పవన్ కల్యాణ్ సారథ్యంలో ఉన్న జనసేన పార్టీ పోటీచేయలేదు. దీంతో గాజు గ్లాసు గుర్తును స్వతంత్ర అభ్యర్థికి కేటాయించింది కేంద్ర ఎన్నికల సంఘం. జనసేన అప్పుడే న్యాయపోరాటానికి దిగింది. అయినా నో ఫలితం.

ఆఖరికి ఆటో, టోపీ, ఇస్త్రీపెట్టె, ట్రక్కులాంటివాటిని కూడా రిజర్వ్ లో పెట్టిన ఎన్నికల సంఘం.. గాజు గ్లాసు సింబల్ ను మాత్రం ఫ్రీ సింబల్ గా మార్చింది. మామూలుగా అయితే మరోసారి మీ నిర్ణయాన్ని పునఃపరిశీలించండి అని జనసేన సమీక్ష కోరవచ్చు. మరప్పుడు ఎన్నికల సంఘం ఏం చేస్తుందో చూడాలి. అయినా పదే పదే త్యాగాలతో ముందుకెళితే.. పరిస్థితి ఇలాగే ఉండదా అంటూ సొంత పార్టీలోనే విమర్శలు వినిపిస్తున్నాయి.